Í fyrstu lotu fáum við góða yfirsýn yfir samtalstæknina, öðlumst djúpan skilning á hæfnisþáttum markþjálfunar og kynnumst því hvaða eiginleika hún inniheldur og hvers hún er megnug. Nemandinn öðlast færni í aðferðinni til þess að geta farið að nota hana og æfa sig utan skólastofunnar. Einnig er lögð áhersla á að hver og einn nemandi fái að upplifa krafta markþjálfunaraðferðarinnar á eigin skinni og öðlast þannig dýpri skilning á sjálfum sér og öðrum. Í lok fyrstu lotu fá nemendur úthlutað mentormarkþjálfa en hver og einn nemandi fær þrjá einstaklingstíma hjá reyndum mentormarkþjálfa á meðan á náminu stendur.

Í annarri lotu förum við á dýptina, köfum í kjarna manneskjunnar og rannsökum flókin fyrirbæri eins og meðvitund og lífsorku auk þess að læra á verkfæri til þess að byggja upp okkar innri styrk og vöxt. Einnig förum við dýpra í lykilþætti markþjálfunar og vinnum verkefni sem styrkja okkur í hlutverki markþjálfans.

Í þriðju lotu kynnumst við fleiri verkfærum og aðferðum sem við getum notað í markþjálfun. Einnig skoðum við muninn á hópmarkþjálfun og teymismarkþjálfun. Á síðasta degi lotunnar, sem einnig er hátíðisdagur, leggjum við lokahönd á námsefnið og lærdóminn. Eftir hádegi fögnum við árangrinum og vextinum sem átti sér stað á meðan á náminu stóð.

Á milli lota er heimanám, þar sem hver og einn nemandi markþjálfar samanlagt í sex klukkustundir á milli lotu 1 og 2 og aðrar sex klukkustundir á milli lotu 2 og 3.

Nokkrum vikum eftir útskrift býðst námshópnum hóptímar með mentormarkþjálfa. Tímarnir veita eftirfylgni til að styðja við áframhaldandi vöxt nemenda eftir námið og efla þróun þeirra í hlutverki markþjálfans. Þessir hóptímar, sem eru alls þrjú skipti, fara fram nokkrum vikum eftir útskrift og samanlagt er um sjö klukkustundir af mentorstundum að ræða. Fyrsta skiptið er staðtími sem tekur þrjár klukkustundir, en hin tvö skipti fara fram á netinu og taka tvær klukkustundir hvort.

Í kjölfar skráningar er staðfestingargjald greitt, kr. 50.000 í gegnum kröfu sem er send í heimabanka. Staðfestingargjaldið dregst frá heildarupphæðinni og er óendurkræft. Við munum svo vera í sambandi í gegnum tölvupóst með hvernig þú vilt haga eftirliggjandi greiðslu.
Ef óskað er eftir því að dreifa greiðslum er hægt að hafa samband á virkja[hjá]virkja.is og kanna möguleikana frekar. Við hvetjum þig til að kynna þér rétt þinn á niðurgreiðslu námsgjalda hjá þínu stéttarfélagi en mörg stéttarfélög styrkja félagsmenn sína til náms í markþjálfun. Áður en styrkur er sóttur þarf námsgjald að vera greitt að fullu.